Actualités Actualités & Infromations

Anapec أجي تفهم أشنوهي أنابيك

:عقد انابيك كونطرا انابيك

كتقلب على خدمة او جاك عرض عمل وهو بعقد انابيك و معرفتي مادير ؟؟ و خايف ماتسنيش ؟؟ عندك تخوف تقبل او ترفض و تندم من بعد ؟؟ الحل ساهل تبع معايا هادشي لي جاي مزيان و ركز معايا لان القانون لا يحمي المغفلين عرف حقك و عرف واجباتك و ماتخافش

:أولا غانشرحو ليكم شكون هيا هاد انابيك
الوكالة الوطنية لانعاش الشغل و الكفاءات هي مؤسسة عمومية عندها الاسقلالية المالية و المعنوية، وهي تحت الوصاية ديال وزارة الشغل، و جميع الخدمات ديالها مجانية و كنسطر عليها بزوج سطورا ” جميع الخدمات ديالها فااابور ” و تبع معايا مزيان النشاط ديالها كيتفرق على 3 المحاور كبرى

الوساطة فسوق الشغل بين المشغلين و للباحثين عن عمل لي هو نتا. و هادا سميتو برنامج ادماج سميوه لي بغيتو، دبا علاش دارو هاد كونترا انابيك علاش مايكونش كونترا عادية حيت هاد لي كونترا ماكيزعموش عليهم الشركات و ماكيبغيوش اخدمو شباب لي ماعندهمش خبرة بهاد نوع ديال لي كونطرا حيث ببساطة فيها مجموعة من الالتزامات و التكاليف للمشغل و كيدير بناقص وكيجيب سطاجير احرث بيه ولا تايخدم فالنوار باش الدولة توضع حد لهادشي خرجو مفهوم جديد سميتو عقد ادماج لي هو عبارة عن سطاج ايه سطاج مع وعد بالعمل و لكن ماشي بالضرورة تخدم مني تسالي غي بلاتي متزربش و تبع معايا مزيان، هاد عقد انابيك فيه مجموعة من المميزات للمشغل و للباحث عن العمل، بالنسبة للمشغل مكيخلصش الاقتطاعات ديال لاسينيسيس بالنسبة للباحث عن العمل مكيخلصش الضريبة على الدخل و كيستافد من التغطية الصحية الاجبارية غاتقوليا علاش مايستافدش من لاسينيسيس او التقاعد مزيان، رجع لشنو قلت فاللول نتا لحد الآن غي سطاجيير خاصك تكون واعي بهادشي و المشغل قلنا مكيخلصش عليك و نتا كذلك فكيفاش بغيي تستافد منها و انت مخلصتيهاش و اصلا الصندوق حريرتو حريرا غي خليو داك الجمل راقد 😉 المهم مني غاتمشي تسني كونترا خاصك بطبيعة الحال تقراها مزيان و الحاجة لي مفهمتيهاش سول عليها من حقك و مافيهاش عيب وخصك تعرف بلي ممكن تستقل او ممكن اجري عليك المشغل فأي وقت و هادشي خاص اقولها ليك فالاول نهار سينياتير، عندك الحق تستافد من كونترا انابيك اذا مافاتش 6 شهور نعطيك مثال اذا خدمتي بعقد انابيك و دازت شهر او شهرين او حتى خمس اشهر و خرجتي او خرجوك فعندك الحق تستافد من عقد انابيك اخور إلى جاب الله لقيتي خدمة بكونترا انابيك اما إلى فتي 6 شهور د الخدمة و خرجتي فمعمرك باقي غاتستافد من كونطرا انابيك حيت لسبب بسيط الدولة غاتعطيك زوج فرص باش تستافد من عقد انابيك لي فيهم المميزات لي قلنا فالاول و مغاتبقاش ديما تخلص عليك الضريبة و على المشغل الاقتطاعات وانت تبقا تبدل من خدمة لخدمة و ديما بعقد انابيك و هادشي فيه ردع للمشغلين باش مايبقاوش ادخلو و اخرجو ناس و استغلو المميزات لي فالعقد ( قلنا متيخلصش الضمان الاجتماعي و الضريية على التكوين المهني) و خاصك تعرف ان المشغل حتى هو اذا مالتزامش اخدم 60% من ناس لي دار ليهم كونطرا انابيك فراه معمرو غايستافد مرة اخرى من هاد المميزات مثلا اذا شي شركة خدمات 10 ناس ب سطاج /كنطرا انابيك فكيلزمها تخدم بعقد على الاقل 6 ناس اذا تايبقى الحل هو تفرض راسك وتكون مابين دوك 6 و تبين على حنت اديك. واحد القضية قبل منساها هادشي كاملو فاابور انابيك مكتاخدش منك ولو درهم واحد اذا قاليك المشغل ديالك راه اقتطعنا ليك شي حاجة حيت هادي مقابل ديال انابيك حيت هي سبب حتى تلاقينا ولاشي لعيبة عرف بلي غي هو لي قطعهم ودارهم فجيبو انابيك مايمكنش بقوة القانون و مايمكنش اصلا دخل فلوس من هادشي و خاصك تعرف كذلك ان عقد اناييك اقل حاجة فيه هو 1600 درهم و اكثر حاجة هو 6000 درهم و اقصى مدة هو 24 شهر اي عامين كتسالي كونطرا تلقائيا اما كتفارقو اما كيحولها لكونطرا عادية حلالا طيبا و نتا سطاجير خاصك تفرض راسك باش ترسم معاهم ان شاء الله. و دبا مني عرفتي هادشي كامل و عرفتي لي عليك و لي من حقك ف انت غاتعرف واش تسني كونطرا انابيك او لا و اذا بغيتي رأي ديالي غي سنين احنيني او لا حنينتي و توكل على الله وان شاء الله اكون خير … مدبرها حكيم

2- التكوين واعداد يد عاملة كفأة كتناسب لمتطلبات سوق الشغل ( كدير دورات تكوينية على حساب دراسة كديرها كتبين لها كل جهة فالمغرب اشمن نوع د الخدمة مطلوب فيها اولا الشركات فديك البلاصة اشمن خصاص عندهم و عليها كيلونصيو دورات تكوينية باش الشباب اتكونو واكون عندهم دبلوم فداك التخصص و اقدر اخدم هادشي فابور ولكن ماشي غايخدموك من بعد الدورة التكوينية لا فيق معايا هما كيتنبأو فقط نعطيك مثال ( فجهة الدار البيضاء مثلا الدراسة عطات ليهم بلي كاين خصاص فعمال مجال الفندقة فهما كيلونصيو دورة تكوينية للشباب لي بغاو هاد المجال على اساس اكون عندو دبلوم و مني تجي شي شركة تتقلب على هادشي كيعيطو ليك) هذا طرقناه هادي سميتها formation qualifiante de reconversion

3- توجيه و مرافقة حاملين المشاريع او عندك مشروع باغي تبداه معارفش ولا غرام على كفاش تأسس شركة او اشمن نوع د الشركات الوراق لي خاصك المهم كلشي كتمشي لاي اجونص انابيك قريبة ليك كتاخد معاهم موعد و كتكمل معاهم و فيها بزاف د الحوايج اعاونوك فيها او يوجهوك حتى باش تلقى التمويل عند جهات مختصة كالمبادرة الوطنية للتنمية البشرية الى غير ذالك و شخصيا كنصحكوم اتجهو لهاد الاتجاه دير مشروع ديالك وخا يكون بسيط و هما غادي اعاونوك و هادشي فابور و كنسطر عليها و اذا شي حد بغا يطلب منك شي مقابل دير بيه شكاية و من الاحسن كتابية و صرعها و تفرج ديك الساعة و غاتسمع خبارو، القانون لا يحمي المغفلين

هادشي بخلاصة أهم ادوار ديال اناييك نتمنى تكونو ستافدتو و ماتبقاوش تخليو شي واحد اضحك عليكم و سولو على هادشي لي قلت ليكم و تأكدو منو راه اي اجونص انابيك مشيتي ليها سولهم غايشرحو ليك كولشي تحركو ترزقو و ماتنساوش تبارطجيو تنفعو غيركم الله اسهل على الجميع

 😊

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *