Actualités Actualités & Infromations

اجي تفهم الشيك وكيفاش تعامل به

الشيك

فهاذ المقال غادي نحاولو نعرفو معلومات مهمة على الشيك ونعرفو كيفاش نتعاملو بيه الموضوع فيه بزاف ما يتقال، لذلك غيكون طويل شوية أولا خاصنا نعرفو بلي الشيك كيخضع لمدونة التجارة

أشنو هو الشيك ؟
الشيك آ سيادنا وثيقة كيأمر بيها مولاه البنك باش يخلص المبلغ اللي مكتوب فيه لشي واحد من داك الرقم الحساب اللي مكتوب، و هو وسيلة أداء  فوري بخلاف الأداء إلى أجل، يعني أن اللي سيناه كيصرح أنه عندو المبلغ اللي كتب فيه موجود فحسابو فداك التاريخ و اللي خداه يقدر يتخلص فيه ديك الساعة

كيفاش نعمروه ؟ 
كنبداو بالمبلغ ما كاينش مبلغ أدنى بالأرقام (نقدرو نزيدو حداه رمز # من جوج جيهات باش ما يزيدش شي واحد الأرقام من ورانا)، من بعد نفس المبلغ نعاودوه بالحروف و خاص نكتبو ضروري العملة (الدرهم والسنتيم) ما نكتبش مثلا غير (ألف)، يلا كنا عارفين المستفيد نقدرو نكتبو سميتو و كنيتو، ما كناش عارفين نخليوها خاوية ولا نكتبو لحامله، و خاص ضروري نكتبو التاريخ (فاش سنيناه) و المدينة (هادي على ود المحكمة اللي غادي تدرس القضي فحالة الدعوة القضائية)، و فاللخر كنديرو إمضاء مشابه لداك اللي عطيناهم فاش حلينا الحساب النهار اللول. كاين جوج حوايج نقدرو نزيدوهم على حساب الموقف اللي حنا فيه، أولا يلا بغينا داك اللي غادي يتخلص فالشيك بزز منو يدفعو فحسابو باش يتخلص كانزيدو جوج خطوطة متوازيين بحال هاكا // (غالبا فالقنت الفوقاني على اليسار)، ثانيا يلا بغينا هاداك اللي كتبنا سميتو هو اللي يتخلص فيه و ماشي شي واحد آخر كنزيدو هاد العبارة (غير قابل للتظهير أو الفوق الوسط، و نقدرو نديروهم بجوج فدقة
نقدرو نعمرو شيك فسميتنا، باش نخرجو فلوس من أي وكالة و بذلك ما كنخلصوش ديك 11 درهم ديال التخراج بلا شيك و فهاد الحالة تنخليو بلاصة ديال لأمر خاوية ولا تنكتب لأمري
ملي نعمر شي شيك، ديما نتذكر نعمر حتى الجزء اللي بقا فدفتر الشيكات ، باش نبقا عاقل المبلغ و الشخص اللي عطيتو الشيك

من بعد ما شفنا التعريف ديال الشيك و الطرق باش نعمروه 
نكتاشفو دابا المراحل اللي من بعد التعمار و نشوفو الحالة ديال عطيتي شيك و نتا ما عندكش فلوس فالحساب لسبب ما، أي عمرنا الشيك و خلصنا بيه شي حد، فهاد السيد، علا حساب واش خليناه أي ما درناهش // يقدر يمشي لأي وكالة يتخلص فيه نقدا  أو درناه كي دفعو فحسابو، (هاد السيد) عندو مدة 21 يوم كتسمى (اللي نتا خاص تخلي فيها داك المبلغ محطوط فحسابك) باش يمشي يتخلص فيه و يلا ما لقاش لفلوس كياخد من البنك ديالو ورقة  يقدر يدعيك و تمشي فالتحقيق و تقدر توصل للحبس بدعوة إصدار شيك بدون رصيد ، من بعد هاد المدة ديال 21 يوم (داكشي علاش تاريخ إصدار الشيك مهم بزاف) فنتا كتبقى مدين لداك السيد بداك المبلغ و ملزم تخلصو ليه و تيبقى عندو الحق يتابعك في حالة ما تخلصش فيه، و نذكرو أن تاريخ صلاحية الشيك اللي تدار فالمغرب هو عام و 20 يوم و اللي تدار خارج المغرب هو عام و 60 يوم، و ملي كتفوت هاد المدة البنكة ما غاديش تخلص الشيك و لكن تيبقا عليك الشيك كدليل أن داك السيد كيتسالك الفلوس و يقدر يتابعك بيه (يعني فكل الحالات نتا متبوع بالخلاص). من بين العواقب الأخرى ديال أن داك السيد دفع الشيك و ما تخلصش فيه هو أنك كتولي ممنوع من الشيكات مدة 10 سنوات فجميع الأبناك المغربية، و باش تحيد هاد المنع خاصك تخلص السيد فالمبلغ و تاخد من عندو الشيك و تاخد ورقة من البنك ك و تمشي تخلص كضريبة للدولة 5% منو فالخزينة العامة يلا كان هو أول شيك ديالك اللي ما تخلصش بدعوة أن الفلوس فحسابك ما كافيينش ، و الثاني كتخلص عليه 10% و الثالث %20، و تدي هاد الحجج للبنك باش يصيفطهم لبنك المغرب يحيد ليك هاد المنع
نذكرو أن الشيك وسيلة أداء في الحين يعني أنك يلا عطيتي شيك فنتا كتلتزم أن الفلوس عندك فحسابك، و واخا تدير تاريخ فايت التاريخ ديال فاش كتبتيه راك ما كتكونش محمي، أي أن داك السيد يقدر يمشي يتخلص فيه ديك الساعة ما يتسناش يوصل داك التاريخ، و الشيكات كضمانة  أو كسلف  ممنوعين قانونيا

شنو العوامل الأخرى اللي يمكن ما يتخلصش الشيك على قبلها

 من بين الأكثر تداولا
إمضاء غير مطابق : هاد الحالة كيعانيو منها بزاف ديال الناس، أي أن نهار اللول كيحط إمضاء فالبنك و كينسا عليه ولا ما تي بقاش يدير بحالو و فالشيك كيدير إمضاء مغاير، ملي تيكون قريب شوية البنك يمكن يغمض عينيه (بعد الاتصال بالزبون و التأكيد أن هو اللي عطا الشيك)، و لكن ملي تيكون الامضاء مغاير تماما فيقابل بالرفض. للمعلومة واخا يكون الامضاء مغاير فالبنك كا تشوف واش الحساب فيه الفلوس على قدر مبلغ الشيك و يلا ما كانوش فكايتمنع مولاه من الشيكات 10 سنوات، و هادشي باش ما ينوضش واحد ما عندوش فلوس يعطي شيك و يدير فير عن قصد إمضاء مغاير لديالو
تظهير غير ملائم : فاش كندفع شي شيك فحسابي باش البنك يتخلص ليا فيه، خاصني نسيني فالظهر ديالو، ولا يلا مثلا شي واحد عطاني شيك و أنا بدوري خلصت بيه شخص آخر خاصني نسيني أنا فالظهر و ملي يبغي يدفعو هو يسيني حتا هو فالظهر (هادي فالحالة يلا الشيك ما كانتش مكتوبة فيه عبارة أي يقدر يدوز من شخص لآخر)
شيك معترض عليه  : ملي كا يضيع ولا كيتشفر ليا شيك خاصني نعلم البنك و ندير  و نديها ليهم باش حتا يلا عمرو شي واحد و دفعو ما يتخلصش فيه، و لكن فحالة كنت أنا فعلا عمرت الشيك و بلعاني درت باش ما يتخلصش فالقانون يعاقب ب 1 حتال 5 سنين ديال الحبس و غرامة بين 2000 و 10.000 درهم
إختلاف بين المبلغ بالأرقام و المبلغ بالحروف: هاد الحالة حتا هي شائعة، بعض المرات كاين اللي فاش تيعمر الشيك فاش تيكتب بالحروف تاينسا مثلا السنتيمات ولا تينسا المئات (مثلا 1340 درهم و تيكتب “ألف و ثلاث و أربعون درهم”)، المهم فاش تيكون الاختلاف مدونة التجارة كتقول لينا أن الشيك خاصو يتخلص بالمبلغ اللي مكتوب بالحروف، و لكن تفاديا لكل سوء تفاهم بين مول الشيك و اللي غادي يتخلص فيه فغالبا البنك كيرجع الشيك و كيعلم مولاه باش يعاودو
للتذكير فيلا رجع ليك شيك لسبب من الأسباب، فيمكن تخلص للبنك، و هادا لأنك ما درتيش الاحتياطات ديالك باش الشيك يتخلص
فاش تيعطينا شي واحد الشيك و باش نتفاداو يرجع لسبب ما أو أننا ما نتخلصوش فيه (خصوصا فحالة المبالغ الكبرى) نقدرو نطلبو منو أنه يدير ليه (عملية يؤدى عنها يعني ماشي فابور) عند البنك ديالو، و اللي كا تعني أن البنك كيضمن ليك أنك يلا دفعتي داك  ف 20 يوم ابتداءا من نهار ديال ، (كيضمن ليك) أنك غادي تخلص فيه كيف ما كان الحال.
تقدر أيضا تتاصل بالوكالة ديالو (االي مكتوبة فالشيك) باش تاخد معلومات عامة على داك الشخص واش المعاملات البنكية ديالو مزيانة، ما عندوش مشاكل مع الناس، و تسولهم واش تقبل من عندو شيك بداك المبلغ، هوما ما غاديش يعطيوك معلومات على شحال عندو فالحساب، و لكن غادي يعطيوك فكرة على التعاملات ديالو

😊✌ وفي الأخير كنتمنى أنكم ستافدتو بارطاجيو باش تفيدوا صحابكم 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *